• 5
  • 2
  •  
  •  
  •  
    7
    Shares

Одатий рецептларга бир-иккита махсус усулни қўшинг.

Озиш – осон вазифа эмас, айниқча тананинг маълум бир қисми ёқмаган ҳолатда. Зеро, вазн фақат қорин ёки бўксаларда эмас, балки бутун организмда йўқолади. Шунинг учун тўлишган юзни ўзгартириш жуда қийин ва бу асабга тегади. Лекин бунинг ҳам йўли бор.

1. Юз учун машқлар

Юз гимнастикаси яхшироқ кўринишга ёрдам бериб, кексайишга қарши курашади ва мушакларни кучлироқ қилади.

Айрим тадқиқотларга кўра, машқларнинг мунтазам равишда бажарилиши мимика мушаклари тонусини яхшилайди ва юз янада озғин бўлиб кўринади.

Асосий машқлар қуйидагича:

  • Яноқларингизни шиширинг – аввал иккала томонни, сўнгра навбати билан ҳар бирини.
  • Лабларингизни бир нуқтага жамланг, сўнгра уларни очмаган ҳолда шу “нуқтани” ҳар томонга ҳаракатлантиринг.
  • Тишларингизни жипслаштириб, кенг жилмайинг. Бир неча сония давомида юзни шундай ҳолатда сақлаб туринг.

Юз гимнастикаси мимика мушакларини зичлаштиргани боис юз ёшроқ бўлиб кўринади. Бироқ, бунинг учун камида саккиз ҳафта давомида кунига икки маротаба шуғулланиш керак.

Юз машқлари ёғни эритишига ёрдам бериши борасида тадқиқотлар ҳозирча ҳеч қандай маълумот бермаган. Лекин мушаклар тонуси зарар қилмайди, қувват тўла мушаклар эса юзни янада таранглаттиради.

2. Кундалик кардио-машқлар

Юздаги ёғлар кўпинча ортиқча вазн асорати ҳисобланади. Озиш доим тананинг ҳамма қисмларига таъсир қилади, шу боис вазн йўқотсангиз, юзингиз ҳам ўзгаради.

Кардио-машқлар, бу – юрак уришини сезиларли даражада тезлаштирадиган аэроб машқлар. Бу озишнинг энг самарали усулларидан бири: кўплаб тадқиқотларда вазн йўқотишда кардионинг аҳамияти тасдиқланган. Машқлар қанча мунтазам бажарилса, шунча кўп вазн йўқотасиз.

Ортиқча килограммларга қарши курашда асосий нарса, бу – доимийлик. Ҳафтасига 150-300 дақиқа кардио озишга ёрдам берадиган меъёрдир. Бу кунига атиги 20-40 дақиқани ташкил қилади.

Югуриш, сузиш, велосипед ва тез қадам билан сайр қилиш – буларнинг бари кардио. Ишга пиёда боришга ёки йўлнинг маълум қисмини транспортсиз босиб ўтишга ҳаракат қилинг. Нима учун айнан ишга боришда? Чунки бу вазиятда шошиласиз ва тезроқ қадам босасиз, қайтишда эса бемалол юрасиз.

3. Сув, сув ва яна сув

Йўқ, кунига саккиз стакан сув ичманг. Бу меъёрга амал қилиш шарт эмас, аммо чанқоқни ҳис қилмаслик зарур. Етарлича сув ичаётганингизни қандай тушуниш мумкин? Стол устига сув солинган бутилка ёки кружкани қўйиб, ҳар сафар нимадир чайнаш истаги юзага келганида, чарчоқ ёки ноқулайликни ҳис қилганда бир қултум сув ичинг. Яна ичгингиз келса, ичинг.

Суюқлик миқдори етарли бўлмаса, озолмайсиз.

Гап юз ёки бошқа нарса ҳақида кетаётгани муҳим эмас. Бир тадқиқотда маълум бўлишича, нонушта чоғида ичилган сув калориялар истеъмолини 13 фоизга камайтиради. Мунтазам равишда етарли миқдорда сув ичиш метаболизмни тезлаштиради, яъни кўпроқ калорияларни эритишга ва озишга ёрдам беради.

Агар суюқлик доим етарли бўлса, организмнинг сувни ушлаб қолишга эҳтиёжи бўлмайди. Демак, юзни катта қилиб кўрсатадиган шишлар ҳам камроқ бўлади.

4. Алкоголдан воз кечинг

Алкоголь миқдорининг ҳар қандай оширилиши юзни шишириши мумкин. Ҳаммада алкоголга таъсирчанлик турлича бўлгани учун айримларга ҳаттоки бир бокал вино ҳам тақиқланади.

Алкоголь ичимликларда ҳамда уларнинг ёнидаги газакларда калориялар жуда кўп, шунинг учун ичкилик – сезиларсиз вазн йиғишнинг сабабларидан биридир.

Кўзгуда чиройли юзни кўришни истасангиз, ўзингизни қўлга олинг ва ичкиликка ружу қўйманг.

5. Содда углеводларни камайтиринг

Яна ўша гап: шакар, пишириқ ва арзон макаронлар фойдасиз калорияларнинг манбаи. Нафи йўқ, аммо ёғи кўп.

Бу маҳсулотларда хом ашё тозаланганидан кейин фойдали озуқа моддалари ва клетчатка қолмайди. Клетчатка йўқлиги туфайли улар тезда ҳазм бўлади ва қондаги қанд миқдорини оширади. Сўнгра у яна тезда пасаяди ва очлик ҳиссини уйғотади. Очиликни конфет ёрдамида йўқотишга уриниб, арғимчоқни ортга итарамиз: тез орада яна битта конфет ейиш истаги юзага келади.

Содда углеводларнинг айнан юздаги ёғга таъсирини аниқлаб берган биронта ҳам тадқиқот мавжуд эмас. Бироқ мантиқан ўйланса, содда углеводлар мураккабига алиштирилса, вазн йўқотилиши осонроқ кечади.

6. Тўлақонли уйқу

Кам ухлайдиганлар вазн орттиради. Ва аксинча.

Биз кўпинча уйқу танқислиги егулик билан қондирамиз. Натижада, ортиқча вазн яноқларимизда қўним топади. Етарлича ухламаслик стресс гормони саналган кортизолнинг қондаги миқдорини оширади. Унинг организмда мавжуд бўлишидан қоладиган салбий асорат, бу – вазн ортиши.

Тадқиқотларга кўра, юқори даражадаги кортизол метаболизмни секинлаштириши туфайли калориялар қайта ишланмайди ва ёғ шаклида тўпланади.

Тўлақонли уйқу эса килограммларни йўқотишга ёрдам беради. Мукаммал мақсад – саккиз соат тўлақонли уйқудан иборат.

7. Камроқ туз истеъмоли

Танангизда, жумладан юзингизда пайдо бўлган шишлар жуда кўп туз истеъмол қилишингиздан дарак беради. Шу боис юзингиз шишиб кетгандек кўринади. Ортиқча туз сабабли организмда сув ушланиб қолади, тўқималарда эса ортиқча суюқлик тўпланади.

Умуман тузсиз яшаш ҳам мумкин эмас: бу ҳам зарарли. Лекин турли тамаддилар ва ярим тайёр маҳсулотлар таркибида жуда кўп туз бўлади. Консервалар, чипслар ва колбасадан воз кечинг. Фарқни сезиш учун шунинг ўзи етарли. Бир-икки ҳафта ўтгач, юзингиз нисбатан озғин бўлиб кўринади.

Ёдда тутинг

Фақат юзнинг ўзини оздиришнинг иложи йўқ. Унинг кўриниши тананинг умумий массасига боғлиқ.

Лекин одатий озиш рецептлари, яъни кардио-машқлар, мувозанатланган парҳез ва уйқу режимига юз учун махсус бир-икки усулни қўшиш мумкин:

  • Юз тонусини ошириш учун мимика мушаклари гимнастикаси.
  • Шишлар кетиши учун ортиқча туздан воз кечиш.

Телеграм, Facebook, Одноклассники ва ВК даги каналларимизга обуна бўлишни ва дўстларингиз билан қизиқарли лайфхакларни улашишни унутманг!